Súkkulaðikókoskaka með ferskfíkjusírópi

 

Súkkulaðikókoskaka með ferskfíkjusírópi

 

Þessi snilldarkaka er ,,samsoðningur,,  úr tveimur kökum sem ég sá í matgæðingatímaritinu ALLT OM MAT sem ég kaupi reglulega hér í Sverige.  Hver biti er eins og konfektmoli - bakið og njótið

BOTNINN

4 dl kókos

1 dl hrásykur

½ dl ljós síróp

1 msk gæða kakó

1 msk hveiti

4 meðal stór egg

Ofninn hitaður í 175. Öllu blandað varlega saman og sett í smurt lausbotna form -eða setjið bökunarpappír í lausbotna form.  Bakað í um 20 mín eða þar til fallega gyllt.  Kælt. 

 

SÚKKULAÐIBRÁÐ

225 gr suðusúkkulaði

100 gr fíkjusúkkulaði (súkkulaði með fíkjufyllingu t.d. Marabou)

1 -1 ½ dl rjómi

1 msk hunang

1 msk smjör

Allt er þetta brætt saman og hellt yfir vel kældan botninn.  Kælið í um 5-6 tíma

 

FERSKFÍKJUSÍRÓP

6 ferskar fíkjur

1 dl hrásykur

1 dl vatn

Smá cayunpipar  (e smekk) gefur alltaf svo skemmtilegt sterkt eftirbragð

Fíkjurnar skornar í tvennt og kjötið tekið úr og setti í pott með sykrinum, vatninu og piparnum og soðið í 2-3 mín. 

SÍRÓPIР er borið fram með getur hver og einn fengið sér að vild Punkturinn yfir I er svo smá sletta af rjóma

Kjúklingur með snilldarfyllingu

Þennan gómsæta kjúkling má undirbúa með dags fyrirvara  - Það er alltaf gott að eiga einn slíkan rétt í kollinum eða á bloggi. 

Magn ræðst af fjölda matargesta.  En ég miða við þetta magn af fyllingu við 5 kjúklingabringur (hafðu ekki áhyggjur ef þér finnst þú vera með of mikla fyllingu - hún klárast ALLTAF - hvort heldur sem meðlæti eða fylling - það er bara ekki hægt að gera of mikið af henni en hlutföllin eru eftirfarandi.....fyllingin stendur alveg ein og sér með hvað kjöti sem er - hef gert hana með svínakjöti og lami og alltaf er hún snilld

Fylling:

200 gr döðlur

1 krukka sólþurrkaðir tómatar

1 poki furuhnetur

2 msk ólífuolía

fullt af fersku rósmarín

Kastali eða Gullostur eða fyrir okkur sem búum ekki á Íslandinu góða bara einhver góður hvítmygluostur. 

2-3 hvítlauksgeirar

svartur pipar

 

Furuhnetur ristaðar. Döðlur, tómatar og rósmarínið skorið smátt og steikt á pönnu í olíu.  Hvítlaukur settur útá í restina -ekki á of heita pönnuna þá kemur svo beiskt bragð.  Osturinn settur í bitum útá heita pönnuna og látinn bráðna.  Piprað e smekk. 

 

Kjúklingabringur (magn eftir fjölda gesta)

Skorin er smá rauf í kjúklingabringuna og fyllingunni komið inn og ofaná.... tannstönglar til að festa saman.  Sett í ofnskúffu með álpappír ofaná eða lokað eldfast mót í 200 gr heitan ofn í ca 40 mín.  síðustu mínúturnar er gott að taka lokið af til að ,,gylla,, matinn.  Hvítlaukar helmingaðir og steiktir með í skúffunni eða í eldfasta mótinu og notaðir sem meðlæti - alltaf góðir svona bakaðir hvítlaukar

 

Sæt kartöflumús alveg snilld með

sætar kartöflur afhýddar og soðnað í smá vatni - hálf gufusoðnar

Maukaðar með töfrasprota í smá af eigin suðuvatni

Smjör og púðursykursett útí eftir smekk og kaloríuvild - mér finnst gott að hafa slatta af báðu veður þá flauelsmjúkt og enn ljúffengara - maður er nú ekki alltaf með smjör og púðursykur í matinn er það?? gera vel við sig af og til - getur ekki verið hættulegt.  Pipra vel með svörtum pipar.

Oftast hef ég með ferskar grænar baunir eða sykurbaunir soðnar í smá söltu vatni.

Ógleymanlegir hamborgarar

Ógleymanlegir hamborgarar

800 gr nautahakk
3 choriso pylsur (sterkar kryddpylsur)
1 msk soja sósa
1 msk paprikuduft
salt - pipar
tabasco sósa
Pylsurnar eru saxaðar í mixer og svo er öllu blandað saman og myndaðir þykkir hamborgarar  - ég fékk 6 úr þessari uppskrift.   Betra er að móta þá aðeins þynnri í miðjunni og þykkari í köntunum - þannig halda þeir best formi við steikingu. 


2 stórir laukar
vel af sterku/sætu sinnep (ég nota gjarnan kornótt sætt sinnep)
3 msk sykur
50 gr smjör
Salt/Svartur pipar e smekk

Laukurinn mýktur/steiktur í smá olíu - má þó ekki brúnast umof
Sinnepi, sykri og smjöri bætt útí og látið malla um stund 
Þessi sósa geymist ágætlega í ísskáp þannig að það er allt í lagi að gera nóg af henni hún er snilldar meðlæti með alls konar mat - t.d. steiktum fiski - steik og á samlokur

Á brauðið smurði ég sýrðum rjóma  - setti smá salat - fullt af súrum gúrkum og ost 
Ummæli matargesta - BESTI HAMBORGARI EVER

Meðlæti

RAUÐKÁLS-MANGÓ salat

Rauðkál skorið fínt
mangó skorið í þunna strimla
kóríander saxað smátt
steinselja söxuð smátt
hunang e smekk
lime djús ferskur
tabasco sósa smá sletta
s-p

Allt sett saman í skál - brakandi ferskt og framandi

Kínverskar vorrúllur

Ógleymanlega góðar vorrúllur.  Þetta er svo slump/tilfinningar-uppskrift og er vel þess virði að prófa. 

Fyllingin:
800 gr nautahakk
4 stórar gulrætur
4 nokkuð stórir sellerístilkar
1/2 hvítkálshöfuð
2-3 bollar rúsínur
stór biti engifer
3 hvítlauksrif
1 súputeningur
súrsæt sósa
garlic sósa
fiskisósa
svartur malaður pipar
Smá sykur ;)

Gulræturnar og engiferið rifið niður.  Sellerí og hvítkál saxað niður í mjóa strimla.  Öllu skellt í stóran pott og steikt.  Smakkað til með sósum.

Vorrúllupappírinn sem fyllingin er sett inní fæst í Nings Sælkerabúðinni og í verslunum innflytjenda víða um heim (hehe alla vega á Íslandi og í Svíþjóð:lol:) 

Fyllingin sett inní á neðri brún pappírsins og vafið inn og djúpsteikt við háan hita.  Leiðbeiningar fylgja yfirleitt pappírnum ;)

Borið fram með dipping sósu - súrsætri eða öðrum sætum austurlenskum sósum.  Brakandi ferskt og gott.  Verður eiginlega að borða strax.  

Ummæli gesta - Váááá þetta er ekkert smá hrikalega gott  

Mexican fiesta kjúklingasalat

Salatið:

salatblöð eða salatblanda, (magn eftir smekk)

1-2 dós svartar baunir

1 dós maísbaunir

3 stórir tómatar, skornir í bita

1 rauð paprika, skorin í litla bita

1 gul paprika, skorin í litla bita

¼ - ½ rauðlaukur, skorinn í strimla

Stór lúka af fersku koriander, klippt niður

6 kjúklingabringur maríneraðar og steiktar

Hnetusmjörs-koriandersósa, sjá uppskrift neðar.

Marinering á kjúklingabringur:

1/2 bolli tequila (má sleppa)

¾ bolli lime safi (þarf ekki að vera ferskur en er betra, ca. 5 lime)

½ bolli appelsínusafi (ferskur út 2 appelsínum, annars úr fernu)

1 msk chili duft

1 stk jalapeno skorinn niður (fræin fjarlægð)

5 hvítlauksrif skorin

2 tsk salt

mulinn svartur pipar

Marínera í 4-6 klst (eða yfir nótt)

Kjúklingur skorinn í bita og steiktur á pönnu með smá af marineringunni – látinn aðeins kólna vellt aðeins uppúr hnetusmjörs – kóriandersósunni og sett yfir salatið  

Hnetusmjörs-kóríandersósa:   3 faldaði hana því hún er svooooo góð

3 msk hnetusmjör

1/4 bolli vatn

4 hvítlauksrif

2 msk hrísgrjónaedik

1 msk hunang

1 msk sojasósa

5 cm nokkuð stór rifin engiferrót 

fullt af fersku kóríander saxað

2 tsk sítrónusafi

Salt og pipar eftir smekk
 

Blanda öllu saman í matvinnsluvél. Geymist í kæli í 2-3 vikur.

Framsetning:

Salatið sett í skál, sósunni hellt yfir eða borin fram sér, kjúklingabringurnar skornar í strimla og settar efst. Gott að bera fram með nachos, guacamole og salsa.

Víetnamskar vefjur

Einu sinni var ég beðin um að koma með uppskrift í Morgunblaðið og þá töfraði ég fram þennan rétt.  Morgunblaðið var að ,,fiska,, eftir ýsuuppskriftum.  Mig langaði að prófa eitthvað nýtt og framandi með þennan annars ágæta fisk og þetta varð útkoman - og hún er alveg svakaleg. Upphaflega uppskriftin var með nautakjöti og kjúkling.  Það fer nú bara eftir efni og aðstæðum hvort passar betur.  En mér finnst nautakjötið betra.  Svo er ýsa ekki fyrsta val mitt sem fiskur í þennan rétt - en ég þurfti að nota ýsu í Morgunblaðinu.

Þetta er einn af mínum uppáhaldsréttum því hann er – ferskur- spennandi  – bragðgóður – hollur próteinríkur – fitulítill og klikkar aldrei

Magn fer algerlega eftir fjölda og hungri - hver og einn getur búið til sínar rúllur eftir smekk og græðgi

fiskur/nautakjöt  

víetnamskur hrísgrjónapappír - mjög þunnur og brothættur - til að vefja rúllurnar upp í

gulrætur skornar í langa og mjóa bita

gúrkur skornar í mjóa bita 

 

Fersk söxuð mynta

Fersk sæt basilika 

Ferskt kóriander saxað

Glærar núðlur - Hrísgrjónanúðlur

Marinering á nautakjötið er breytileg en samanstendur oftast af sesamolíu - hrísgrjónaediki - fiskisósu - wasabi - chili - lime safa - hoi sin sósu - svörtum og ljósum sesamfræjum - kóríander og hunangi  -  Bara svona smá slumbutilfinning
Best að hafa í marineringu í nokkra klukkutíma  

Ýsan er létt soðin / nautakjötið snöggsteikt á pönnu í smá olíu og salt og pipar / látið kólna –

Víetnamskur hrísgrjónapappírinn er bleyttur upp í sjóðandi vatni í nokkrar sekúndur einn í einu

Allt hráefnið látið inn í hrísgrjónapappírinn og vafið upp eins og vorrúllur  - hver og einn vefur sína rúllu -  og fullt af hoi sin sósu

Ótrúlega ferkst og gott

Steikt eggaldin með parmaskinku og parmesan osti

Þetta er gómsætur forréttur sem rennur svo ljúft - er bestur rétt kominn af pönnunni

Eggaldinið er skorið í þunnar sneiðar - langsum - á sko að vefja það upp eftir kúnstarinnar reglum ;).  Það er svo steikt í olíu með smá hvítlauk þar til fallega gullið báðum megin en má ekki verða stökkt. Mér finnst best að láta hvítlaukinn bara rétt í lokin og ekki við mikinn hita leyfa honum rétta að ,,bráðna,, með  -- til að forðast að hann verði beiskur ;)

Tekið af pönnunni og parmaskinka svipað stór lögð ofaná og svo rifinn parmesan ostur þar ofaná.  Smá nýmulinn svartur pipar.  Rúllað saman og fest með tannstöngli.  Graslaukur (passa að hann sé ekki trénaður/grófur þá er svo erfitt að binda) er bundinn utanum og tannstöngullinn tekinn  og WHALA kominn er sætur eggaldinsparmaskinkuparmisanpakki.  Ég myndi gera nóg - því þetta rennur svo ljúft niður en eins og ég sagði áðan er þetta best nýsteikt. 

Ekki er verra að hafa smá hvítt eða rautt með

Miðausturlenska veisla

Vinur minn ættaður frá Ísrael kom eitt sinn færandi hendi til mín með uppskriftabók frá sínu heimalandi, THE FOOD OF ISRAEL/Authentic recipes from the land of milk and honey.  Ég hef mikið skoðað hana og stúderað en ekki haft mig í að kokka eitthvað uppúr henni fyrr en nú um daginn þegar ég fékk svo indæla og skemmtilega gesti sem hafa gaman að því að smakka og útbúa framandi mat. 

Mig hefur lengi langað að gera Falafel.  Nýsteikt falafel......nammm.....með hummus.....


Falafel kemur upphaflega frá Egyptalandi en er mikið á borðum í öllum Miðausturlöndunum. Uppskriftirnar eru með margvíslegu ívafi en megin uppistaða þeirra er maukaðar kjúkingabaunir eða aðrar ljósar mjölmiklar baunir sem kryddaðar eru eftir efni og aðstæðum í hverju landi fyrir sig.  Falafel er venjulegast vafið inn í pitubrauð með hummus og afar gott er að láta Tahina (sósa úr sesamfræmauki og sítrónu) sósu fylgja með.  Mér finnst sjálfri gott að hafa með tómata bakað/steikt eggaldin, pickels og smá sýrðan rjóma. 

Falafel
500 gr kjúklingabaunir (ekki forsoðnar/úr dós)
2 meðal laukar
8 hvítlauksrif
1 búnt steinselja
1/2 búnt koríander
2-4 rautt chilly fer eftir þori og gæðum
2 tsk cummin (ekki kúmen)
S&P eftir smekk
1 msk lyftiduft
1 msk matarsóti

Kjúklingabaunir skolaðar og látnar standa í vatni yfir nótt.  Skolaðar aftur (hef prófað forsoðnar úr dós og það virkar ekki, verður alltof mjúkt og djúpsteikist ekki/verður bara að mauki).  
Baunir, laukur, hvítlaukur, steinselja, kóríander, cumin og S&P allt mixað saman með sprota eða matvinnsluvél. Bæta þarf vatni útí þar til allt er orðið að þykku mauki. 

• Blandið svo lyftidufti og matarsóta útí og látið standa í um 30 mín. 

Hitið steikingarolíu í djúpum potti.  Hnoðið golfboltastórar kúlur úr öllu maukinu og steikið þar til gullinbrúnar.

Tahina sósa
180 ml thaini mauk (sesamfræmauk)
safi úr 1-2 sítrónum
2-3 hvítlaukar marðir
Salt e smekk
1 1/2 bolli söxuð steinselja
olífuolía on top

Tahini mauk og sítróna hrært saman þar til að léttri ljósri sósu - vatni bætt útí - á að vera þunnt
Hvítlaukur, salt og steinselja sett út í og hrært um stund (með sleif)
Smá olífuolíu helt yfir - sósa þessi geymist ekki vel í ísskáp og er best að gera rétt áður en matur er borinn fram á að vera við stofuhita.  

Hummus  
500 gr kjúklingabaunir
3 hvítlauksrif ekki pressuð
2 meðal laukar
3 hvítlauksrif
salt
100 ml tahini mauk
Sítrónusafi

Kjúklingabaunir settar í vatn yfir nótt. Skolaðar.  Soðnar með lauknum og hvítlauknum í um 4 tíma eða þar til þær eru alveg maukaðar.  Að suðu lokinni er umframvökva og lausu ,,hýði,, skolað burt og laukur og hvílaukur fjarlægð.  Maukaðar og salti, hvítlauk, tahinimauk og sítrónusafa blandað saman með mixer eða matvinnsluvél. Olífuolía on top. 

Eggaldin
Eggaldin skorin í þunnar sneiðar - sett í ofnskúffu á bökunarpappír með vel af salti og olífuolíu - bakað við góðan hita þar til gullið.